الي من يهمة الامر عن معرفة نانو ايجيبت

طبعا كلنا سمعنا ان فيه عربية اسمها نانو وسعرها رخيص لكن كل ماكتب عن العربية كان خاطئ وانا واحد من الناس روحت شفت العربية قدام عيني وعرفت كل حاجة عنها اللي تقريبا معظمنا مهتم انو يعرفها

اولا العربية بتصميم وافكار مصرية لكن مصنعة في الصين لعدم تعاون المصانع المصرية للانتاج المصري

ثانيا سعر العربية 25 الف جنية مصري وممكن تقسيطها عن طريق بنك ناصر بمقدم 5000 وقسط شهري 350 جنية وكل ده بصورة البطاقة ووصل النور فقط

ثالثا العربية مصممة بطريقة فعلا انها تلائم الطرق المصرية والمستهلك المصري ومن اهم المميزات اللي في العربية

1 – العربية بتقدر تستحمل اعلي درجات الحرارة بدون ما الماتور يسخن لان ماتور العربية من ورا وليها ردياتير بمروحة من قدام يعني دورة المياة اللي داخلة للماتور باردة لذلك العربية مبتسخنش

2 – العربية كلها مصنعة من الحديد وللتوضيح ان مثيلتها الهندية مصنوعة من البلاستيك والفيبر لكن نانو ايجبت مصنوعة كلها من الصاج حتي الاكصدامات من الصاج وعلي فكرة صاج تقيل مش زي اللي موجود دلوقتي في العربيات الحديثة

3 –العربية عالية عن الارض علشان متتأثرش بالمطبات

4 _فيها كاوتش بيلحم نفسو بنفسو

5 –العربية منظرها جميل وصغيرة وواسعة من جوا

6-الماتور 650 سي سي واحد سلندر والسرعة القصوي 80 او 90 كم/ س بعكس مثيلتها نانو الهندية 625 سي سي اتنين سلندر وسرعتها القصوي 70 كم/ س وكمان اللي جربو العربية قالو انها في السفر بتوصل ل 100 كم/ س

7-العربية بدون اسبراتير لانها واحد سلندر يعني مفيهاش اعطال الكهربا وكمان بدون سيور يعني مفيهاش اعطال قطع سيور الماتور

8 –العربية بتستهلك 1 لتر بنزين لكل 30 كلم

ودي يعتبر اهم مميزات العربية لكن فيه مميزات تاني انا بعتبرها كماليات مثلا

1- فتحة سقف

2- باور

3- تكيف سخن

4- فوانيس شبورة

5- سبويلر خلفي مضئ

6- كاسيت حديث

وده تقريبا كل حاجة محتاجين نعرفها عن نانو ايجيبت وياريت بجد اننا نشجع افكار بلدنا ونحاول كمان ان يكون التصنيع في مصر علشان ده بجد هيفرق معانا كتير ويكفي اننا وضعنا اقدامنا علي اول الطريق متمنين لفريق عمل نانو ايجبت النجاح


الأحد، 6 ديسمبر 2009



هناك 6 تعليقات:

  1. السلام عليكم ورحمة الله وبركاتة
    الحمد لله انى قبل ما اموت هشوف منتج مصرى بعقلية مصرية رغم انى عندى 34 سنة لكنى كنت فاقد الامل انى حتى لو عشت ل 100 سنة كمان مش هشوف منتج مصر كبير بعقلية مصرية زى ما شوفت العربية نانو ايجيبت وان شاء الله قريب هتكون بايد مصرية كمان والله انا لو معايا فلوس كنت اشتريتها على طول حتى لو مش هستخدمها يكفى انى ابص ليها وافتخر انها منتج مصرى 100% حتى لو فيها عيوب وبقول للمنتقدين المهاجمين على السيارة ان كل شئ واقعى كان فى الاصل فكرة وحلم وان شاء الله انا متفائل فى تطوير اكثر للسيارة وظهور منتجات اخرى مصرية 100% وتعيش مصر وشعبها مرفوع الراس ان شاء الله
    و

    ردحذف
  2. العيب الوحيد لا فيه فيديوهات بالموقع للعربية وهى بتمشى ولا فى نمر تلفونات للحجر ولا ايميلات ولا خلافة يعنى انا فى اسكندرية محافظات يعنى انا على سبيل المثال اريد واحدة قولولى اعمل ايه

    ردحذف
  3. أزال المؤلف هذا التعليق.

    ردحذف
    الردود
    1. العالمية للتجارة والتوريد
      لو عاوز تزعل اتصل علي ارقام الناس دي برضه
      العنوان ش 15 مايو, شبرا الخيمة, القليوبية, مصر
      التليفون 42211371
      الفاكس 44702959

      دي ارقام الفيديو الموجود بكعب الصفحه دي

      حذف
  4. عنوانهم الوحيد في الدنيا للنصابين دول هو ده ..
    المصرية للاستيراد الوكيل الوحيد للسيارة نانو ايجيبت
    العنوان : 54 ش عرفات - حدائق القبة - القاهرة
    ت / ف : 26039686 - 24559807
    0122505107 - 0171671687

    واتحداك لو في رقم شغال وفي رقم واحد برد وبقلك النمره غلط // عيب هم بيستخفوا بعقولنا

    ردحذف